Vüqar Dadaşov QMİ-i sədrinin İranla bağlı ABŞ Prezidentinə müraciətinə etirazını bildirib

Tanınmış hüquqşünas, Qarabağ qazisi, Azərbaycan Jurnalistlər Birliyinin üzvü, publisist Vüqar Dadaşov  Qafqaz Müsəlmanları İdarəsinin sədri Allahşükür Paşazadənin İranla bağlı ABŞ Prezidenti Donal Trampa müraciətinə etirazını bildirib. Həmin etirazlı olduğu kimi oxucularımıza təqdim edirik. 

"Mətbuatdan məlum oldu ki, Qafqaz Müsəlmanları İdarəsinin sədri Allahşükür Paşazadə  ABŞ Prezidenti Donal Trampa müraciət edərək İrana (İran İslam Respublikası)   qarşı tətbiq edilən sanksiyaların yumşadılmasını xahiş edib. Sözsüz bu məlumatın yanlış və ya “FEYK” olduğunu düşünsəm də sonradan yerli mətbuat orqanları bu məlumatları tirajladı  və bundan sonra bu məlumat həqiqətən mənə narahatçılıq yaşatdı.  Məsələyə qısa şəkildə münasibət bildirmək fikrinə gəldim.  

Əsrlər boyu farsların biz Azərbaycan xalqına və dövlətçiliyinə olan nifrətin, xəyanətin şahidi məhz  tarixin  özüdür və bunları sadalamağa heç lüzumda yoxdur, heç zamanda  yetməz. Tarixin hər mərhələsində farsların Azərbaycana qarşı sonsuz nifrəti açıq şəkildə özünü göstərib və göstərməkdədir. 

Fikir verin, təkcə son bir ayda baş tutmuş İranın Azərbaycana çoxlu sayda xəyanətindən bir neçəsini göstərsək, məsələn:

 -İranın Ermənistanın işğal etdiyi Azərbaycanın Dağlıq Qarabağ  ərazisində yaratdığı separatçı rejiminə yük maşınlarının daimi səfərlərinin bir daha üzə çıxması və sübutu  bu məsələnin  diplomatik səviyyədə müzakirəsi,

-İranın Ermənistana və Dağlıq Qarabağ separatçı rejiminə humanitar köməyi,

 -İranın Azərbaycanın işğal edilmiş ərazilərində Cəbrayıl rayonu istiqamətində Dağlıq Qarabağ separatçı rejimi ilə əlaqə üçün 3 gizli körpünün tikilməsinin və geniş istifadəsinin aşkar edilməsi,

-İran Azərbaycan ərazisinə soxularaq Cəbrayıl rayonu ərazisində Azərbaycanın etirazına baxmayaraq su anbarının tikməsinin və işğalçı ermənilərə istifadəyə verməsinin sübut olunduğu  qısa bir zaman daxilində və fonunda  QMİ-nin rəhbəri Allahşükür Paşazadənin  ABŞ Prezidenti Donald Trampdan İrana qarşı sanksiyaların yumşadılmasını xahiş etməsi heç bir  məntiqə sığmır. Bu məsələdə dini həmrəyliyə əsaslanmaq həm gülünc, həmdə özünə hörmətsizlikdir. Əgər, İran üçün müsəlmançılıq vacib olsaydı İran xristian Ermənistana Qarabağı işğal etməyə və işğalı qorumağa dəstək olmazdı, İran üçün müsəlmançılıq vacib olsaydı Cənubi Azərbaycanda müsəlman xalqımızın dilin, mədəniyyətin, toponimlərin məhv etməzdi, İran üçün müsəlmançılıq vacib olsaydı müsəlman torpaqlarını işğal edən xristian erməni dövlətin işğalçılıq siyasətinə qarşı çıxan azərbaycanlıları zindanlarda çürütməzdi və sair və sair... Hamımıza da bəllidir ki, İran Azərbaycan müstəqilliyini həzm  etmir, Şimali Azərbaycan torpaqlarına iddialıdır  və hətta dövlət səviyyəsində bizləri türk dilində danışan farslar adlandırmaqdan da  çəkinmirlər.

Müsəlman İranın, müsəlman Azərbaycana qarşı nifrətini saymaqla qurtarmaq olmaz. Bu halda QMİ-nin sədrinin ABŞ Prezidentindən İrana qarşı sanksiyaların yumşaldılmasını xahiş etməsi İranın dirçəlməsinə hesablanıbsa ona da belə çıxır ki, biz özümüz özümüzə quyu qazırıq!  İranı dəstəkləmək Azərbaycanı məhv etmək istəyən qüvvələri dəstəkləmək deməkdir. Bunun başqa adı yoxdur.  Əminliklə deyə bilərəm ki, QMİ-nin rəhbəri Allahşükür Paşazadə tərəfindən ABŞ Prezidenti Donald Trampa müraciəti diplomatik qaydalara da uyğun gəlmir ona görə ki, Allahşükür Paşazadə nə siyasi nədə diplomatik fiqur deyil, dini nümayəndədir və siyasi məsələlərə müdaxiləsi xoşagəlməz haldır.  Çox təəssüf, görünən də odur ki, QMİ-sinin sədri məqamları qarışdırıb, və siyasi baxımdan əslində dilə gətiriləsi və səsləndirilməsi  məqbul sayılmayan  İranla bağlı Azərbaycan xalqının maraqlarına ziddir.”

SNN NEWS-Haber