Jurnalistikanı məhv edən “jurnalist”lər...

Tanınmış hüquqşünas, Qarabağ Qazisi, AJB-nin üzvü Vüqar Dadaşov jurnalistika ilə bağlı fikirlərini bölüşüb, həmin yazını oxucularımıza təqdim edirik.

“ Ölkəmizdə və ümumiyyətlə dünyada baş verən siyasi ictimai proseslərin işıqlandırılması  jurnalistlərin bir başa peşə borcudur. Sözsüz ki, hər peşədə olduğu kimi jurnalistika da dinamik  inkişaf prosesi gedir və bu proseslə ayaqlaşan çox az sayda jurnalistlərimizin olduğunu da etiraf etmək lazımdır. Heç kəsə gizli deyil ki, bəzi jurnalistlər  əllərində olan media vasitəsindən hansısa məqsədə görə istifadə edir. Mətbuat orqanı var ki, hansısa məmura, işbaza xidmət edir əlbəttə ki, heçdə “sevgi” əsasında yox. Təsəffür  ki, bəzi mətbu orqanların fəaliyyətinə nəzər salanda görürük ki, “müəyyənləşdirilmiş”  qurum, məmur, işbaz haqqında heç bir məlumat və ya xəbər buraxmır və  dondurulmuş “susqunluq” qarşı tərəf hesabına “yağlanır”. Nə olar ki, etiraf etsək Azərbaycanda neytral mövqe sərgiləyən mətbu orqan və jurnalist  çox-çox az saydadır. Demək olar ki, əksər mətbu orqan, jurnalist  kiminsə yazan əlinə, danışan dilinə çevrilib və “müəyyənləşdirilmişlərin” müdafiəsinə və imicinə xidmət edir. Bu, əslində gülünc bir halı ortaya gətirib. Əsl “jurnalistikanın” necə olacağından xəbərsiz insanlar mətbu orqanlarında özünün şəxsi reklamı ilə məşğul olur, özünü mətbu vasitədə ön plana verir, baş vermiş hadisə barədə məlumatı “köşə” yazısı kimi təqdim edir.

Yeri gəlmişkən, Azərbaycan Jurnalistlər Birliyinin sədri, əməkdar jurnalist Elçin Şıxlı “köşə” yazısı barədə  yazdığı fikirləri sizinlə bölüşmək istərdim: “Əslində , Qərbdə bizim köşə yazısı dediyimizə redaktor yazısı deyirlər. Hərçənd bu o demək deyil ki, həmin yazını nəşrin redaktoru yaza bilər. İşin məğzi odur ki,  redaksiya həmin yazıdakı mövqeni tam olaraq bəyənir və dəstəkləyir, daha bizdə riyakarcasına demirlər ki, “bu fikirlər yalnız və yalnız müəllifindir”. Bəli, həqiqət budur ki, bu gün bəzi “jurnalistlər” köşə yazılarının əsl mahiyyəti itiriblər.  

Mətbu vasitələrdə gedən yazılarda çoxlu texniki, orfoqrafik, bədii və qrammatik səhvlərlə yanaşı əxlaqi, sosial, siyasi baxımdan xalqımıza, dövlətimizə zərərli və təhlükəli mövzuda  məlumatlar  adi hal alıb. Elçin Şıxlının “Sükutdan sitat”  adlı kitabından oxuduğum bir maraqlı məlumatı diqqətinizə çatdırmaq istəyirəm: “La Stampa” qəzetinin saytı yazır ki, Stalin “Pravda”nın redaktorluğunu edəndə  hətta Leninin 47 yazısını bəyənmədiyindən çapa verməyib. Lenin də onun redaktor işini çox bəyənirmiş...             Əslində isə Stalin çoxlarının hələ də anlamadığı bir həqiqəti qavramışdı-naşirlik və redaktorluq edən kəs yazı müəllifindən daha çox hökmə və hakimiyyətə malikdir”

Sözsüz ki, bütün məsuliyyət mətbu orqanının üstündədir və bu məsuliyyəti isə dərk etmək naşirlik və redaktorluq edənin savadının, qərəzçiliyinin və obyektivliyinin nəticəsində  qazandığı  peşəkarlığının möhürüdür. Hər bir peşədə olduğu kimi jurnalistikanın da hər zaman öyrənməli və təkmilləşməyə ehtiyac olduğunu dərk etmək, öz üzərimizdə işləmək, ancaq uğur qazanmaq deməkdir”.

SNN NEWS-Haber